वीर र ज्ञानज्योतिसँगै प्रगतीशीलको भवन उद्घाटन, खानीखोलामा क्याम्पस स्थापना गर्ने मन्त्री मोक्तानको उद्घोष

काभ्रे (खानीखोला) । काभ्रे जिल्लाको खानीखोला गाउँपालिकास्थित वडा नं. ४ मा एकैदिन तीनवटा भवन उद्घाटन भएको छ ।

खानीखोला ४ को वीर आधारभूत विद्यालय र ज्ञानज्योति आधारभूत विद्यालयको २ कोठे आरसीसी भवन र प्रगतीशील कृषक महिला समुहको भवन एकैपटक उद्घाटन भएको हो । उक्त तीनवटै भवनको बागमती प्रदेशका सामाजिक विकासमन्त्री कुमारी मोक्तानले भव्य समारोहका बीच उद्घाटन गरिन् ।

वीर र ज्ञानज्योतिको भवन बागमती प्रदेशको आर्थिक सहयोगमा निर्माण सम्पन्न भएको हो भने प्रगतीशील कृषक महिला समुहको भवन भने खानीखोला गाउँपालिकाको अािर्थक सहयोगमा निर्माण भएको हो ।

भवन उद्घाटन गर्दै मन्त्री मोक्तानले खानीखोला गाउँपालिकामा क्याम्पस स्थापना हुने प्रतिबद्धता व्यक्त गरेकी छिन् । ‘खानीखोलामा एउटा क्याम्पसको आवश्यकता छ भन्ने मैले जानकारी पाएको छु, यहाँ कुनै पनि हालतमा क्याम्पस स्थापना गर्छौ, क्याम्पस स्थापनाका लागि बागमती प्रदेश सरकार प्रतिबद्ध छ’ उनले भनिन् ।

कार्यक्रममा गाउँपालिकाका अध्यक्ष इन्द्रबहादुर थिङ छिन्ताङ, वडाध्यक्ष निशान मोक्तान, खानीखोला गाउँपालिका शिक्षा शाखाका होमबहादुर वाईबासँगै विभिन्न राजनीतिक दलका प्रतिनिधिहरुले आफ्नो धारणा राखेका थिए ।